Psa 72 | MMX | STEP | O Moroa, una anasa loorong kusu ni naba viila mumu loklok at limixin mi lodoxoma mokmokso i ngan mun taram. Una lox ase i mi levelinga loklox akmokso ram,

Psalms 72

Lisingising ti Loorong

1 O Moroa, una anasa loorong kusu ni naba viila mumu loklok at limixin mi lodoxoma mokmokso i ngan mun taram. Una lox ase i mi levelinga loklox akmokso ram, 2 kusu neni naba viila mumu avukat limixin taram at levenaleng neni naba nemen ngan lamgomgo atnedi; la neni nabam gomgonga nedi luvuttadi ua di baava. Neni naba lox i na mi levelinga mokmokso. 3 La limixin at lenep kangka ren naba ngasang kobot; lemenemen teren naba umsu mi loklok manmanton. 4 Loorong naba ila leveloklok at luvuttadi banbalo mi lodoxoma ruturun. Neni naba lok tooro luvuttadi vakpakes la nat pas asi luvuttadi loklok papavas.

5 Limixin taram dinaba lotu saparap amisix u at levenaleng laxangking i soso, la at levenaleng lagaaling im taba asu lososo ren ti na loola la ti mo bok lavaola dibap tavasu. 6 Loorong naba lok ngan larakabu ri leven taamang la naba ngan bok levengkaramis dan im subu ro vana at laxangka. 7 Loklok manmanton naba sisilok lolos kantubu at limixin at ne Moroa keneng at levenaleng axap at lorooro ren; la dinaba ngasang kobot amisik kerekngan lagaaling im taba amixik laxasep.

8 Lixitkis amgomgo ren naba ruka i ro at lenep tas meo, la naba se ro at lenep tas meo, ruka i ro Euprates la naba se at latnese at lavatbung menemen. 9 Limixin boro at lamatbin dinaba tu tiktikbu mi lempatgulom atdi ro melamgo ren; la lavamunepen teren dinaba subu midi gamasa mi lenbantuxu atnedi uto xopok at laxangka ri lok ngangao ren. 10 Lavaorong me Spein la boro at levesoxan bok, dinabak lok leventamtaba rin. Lavaorong me Sheba la Seba dinabam taba i mi leventamtaba. 11 Lavaorong axap dinabat kis tiktikbu ro melamgo ren. Limixin at laranep silok axap dinaba gugu taba i.

12 Neni naba lox asepsu luvuttadi banbalo ua di lotu saparav i basinge lorooro etaba, la nedi bok ua dik pakes la lavapen abulubun. 13 Neni naba belemumu nedi dixo ruuna lolos la di banbalo. Neni naba lox asepsu limixin pakpakes basinge lanmet. 14 Neni naba lox asepsu di basinge limixin loklok papavas, limixin mukmusak, la limixin sepsep tadi. Lorooro atnedi i lok ngan lavanga matmatkun tin. 15 Naba lox avukat do loorong na rooro amisik! Keke limixin dibam taba i mi levengol boro Sheba; la keneng at levesingising at limixin, dinaba tong ke amisik teren at levenaleng axap. La loklox anarong at ne Moroa naba nemen amisik pana ren! 16 Keke na laxangka na umsu mi laxam piao; la lengkong kaana nam tebonot pe mi levempeeve anan, la dinaba pisik solo ngan leventauna ro Lebanon. Keke mo laramenemen silok teren na umsu mi limixin, la naba lok ngan laxangka i umsu mi levempivilis. 17 Limixin di noxo domampe laasen at loorong at levenaleng axap i tu melamgo; la keke mo lakleklen at limixin mumu i naba nemen amisik ngan laxangking. La limixin at laranep silok bok dinaba ngising ne Moroa ri lox anarong nedi ngan ni gara lox anarong pam loorong.

18 Leemi asu ri Leeme Silok ne Moroa me Israel! Neni xusuk mun ik lok mo levempanga maraanu. 19 Leemi asu amisik la kopmen tekavaxap teren ti laasen melemelengan teren! Keke lisisinang teren na suxuna axap lavatbung menemen. Tuturun! Tuturun! 20 Neni na laxavaxap at levesingising at ne Devit, lamdak at ne Jesi.